PDEA Sinunog ang P16-Bilyong Halaga ng Ipinagbabawal na Droga — Ikalawa sa Pinakamalaki sa Kasaysayan ng Kampanya Laban sa Droga

PDEA File Photos

Ang Philippine Drug Enforcement Agency (PDEA) ay nagsagawa noong Oktubre 9, 2025, ng pagsusunog sa mahigit ₱16,086,800,984.03 halaga ng ipinagbabawal na droga sa Integrated Waste Management Inc. (IWMI), Barangay Aguado, Trece Martires City, Cavite.

Ito ay kinikilalang ikalawa sa pinakamalaking pagsira ng mga nakumpiskang droga sa kasaysayan ng pagpapatupad ng batas laban sa droga sa bansa.

Dumalo sa seremonya si Kagalang-galang Jonathan Keith T. Flores, Chairperson ng House Committee on Dangerous Drugs at Kinatawan ng Ikalawang Distrito ng Bukidnon, kasama ang mga miyembro ng komite na sina Secretary Oscar F. Valenzuela, Chairman ng Dangerous Drugs Board (DDB); PDEA Director General Undersecretary Isagani R. Nerez; at Police Lieutenant General Jose Melencio C. Nartatez Jr., Acting Chief ng Philippine National Police (PNP).

Dumalo rin ang mga kinatawan mula sa iba’t ibang ahensya ng pamahalaan, kasaping organisasyon ng DDB, mga lokal na opisyal ng Trece Martires City, mga non-government organizations (NGOs), at mga kasamahan sa media.

Aabot sa 2,904,756.6818 gramo ng solidong ipinagbabawal na droga at 14,117.8500 millilitro ng likidong droga ang sinunog gamit ang thermal decomposition o thermolysis.

Kabilang sa mga sinunog ay 2,336,482.6324 gramo ng shabu, 529,906.1246 gramo ng marijuana, 3,067.6948 gramo ng ecstasy, 8,790.8800 gramo ng cocaine, 11,315.9900 gramo ng ketamine, 10,146.2600 gramo ng nimetazepam, at iba pang uri ng ipinagbabawal na gamot at mga sirang medisina.

Ang mga ito ay nakumpiska mula sa iba’t ibang anti-drug operations ng PDEA katuwang ang iba pang law enforcement agencies, kabilang ang mga ebidensiyang inutos ng korte na sirain matapos ang pinal na desisyon sa mga kaso. Ang mga droga ay mahigpit na binantayan habang sinusunog sa loob ng incinerator sa loob ng 24 oras upang matiyak na ito ay tuluyang masira at hindi na muling magamit.

Kabilang sa mga sinunog ang 1,480,315.2 gramo ng shabu na narekober sa isinagawang operasyon sa karagatan ng Subic, Zambales noong Hunyo 20, 2025; Ito ay 239,550.94 gramo ng shabu na nasamsam sa Dasmariñas City, Cavite noong Oktubre 16, 2021; 119,843.3207 gramo ng shabu sa Port of Calapan, Oriental Mindoro noong Marso 21, 2025; 49,705.2 gramo sa Muntinlupa City noong Marso 14, 2025; 39,826.7 gramo sa Batangas Port noong Setyembre 16, 2025; at 28,986.2 gramo sa BF Homes, Parañaque City noong Mayo 10, 2025.

Sinunog din ang 143,161 gramo ng shabu na narekober ng mga lokal na mangingisda sa karagatan ng Bataan at Batanes at kalaunan ay isinuko sa mga awtoridad.

Ayon kay Undersecretary Nerez, “Ang proseso ng pagsira ng droga ay isinasagawa sa harap ng publiko bilang simbolo ng transparency at accountability, upang maiwasan ang isyu ng drug recycling. Bukas sa mamamayang Pilipino ang aming mga gawain, alinsunod sa adbokasiyang isinusulong ng programang ‘Bagong Pilipinas’ ni Pangulong Ferdinand R. Marcos Jr.”

Dagdag pa ni Nerez, ang pagsira sa ₱16 bilyon o 2.9 toneladang ipinagbabawal na droga ay itinuturing na ikalawa sa pinakamalaki sa kasaysayan ng bansa. Ang pinakamalaki ay naganap noong Marso 16, 2023, kung saan ₱19.9 bilyon na halaga ng droga (katumbas ng 3.7 tonelada) ang sinunog, na ginanap din sa Cavite — parehong sa ilalim ng kasalukuyang administrasyon.

“Ito ay tugon sa direktiba ni Pangulong Marcos na palakasin ang kampanya laban sa ilegal na droga, hindi lamang sa mga malalaking sindikato kundi pati na rin sa mga maliliit na pusher, at agarang sirain ang mga nakumpiskang droga,” dagdag pa ni DG Nerez.

Mula nang manungkulan si Undersecretary Nerez bilang PDEA Director General mahigit walong buwan na ang nakalipas, nakapagsagawa na ang ahensya ng 14 na operasyon ng pagsira sa droga sa buong bansa, na umabot sa halos ₱33 bilyon ang kabuuang halaga.

Patuloy ring isinasagawa ng mga PDEA Regional Offices sa iba’t ibang rehiyon ang regular na pagsusunog ng mga nakumpiskang droga. Pinuri rin ni Nerez ang mga Regional Trial Courts (RTCs) sa kanilang mabilis na pagresolba sa mga kasong may kinalaman sa droga, na nagbigay-daan sa agarang pagsira ng mga ebidensya. #