PAGPUPUGAY SA KASAYSAYAN: PRO-CAR, MALUGOD NA TINANGGAP ANG MAMAMAHAYAG NA AMERIKANA SA CAMP MAJOR BADO DANGWA

(Mga litrato kuha ng RPIO PRO CAR)

Itinampok sa pagbisita ni Liza Mundy ang matatag na ugnayan ng Pilipinas at Amerika, habang muling binigyang-buhay ang kasaysayan ng Camp Holmes at ang kabayanihan ng mga “Angels of Bataan and Corregidor.”

Mainit na sinalubong ng Police Regional Office Cordillera Administrative Region (PRO-CAR) si Ms. Liza Mundy, isang Amerikanang mamamahayag, sa kanyang pagbisita sa Camp Major Bado Dangwa sa La Trinidad, Benguet noong Nobyembre 13, 2025.

Personal siyang tinanggap nina PCOL JULIO S. LIZARDO, Acting Deputy Regional Director for Administration; PCOL FREDDIE M. LAZONA, Chief ng Regional Community Affairs and Development Division; at PLTCOL ROY AUGUSTUS F. CALULOT, Chief ng Regional Public Information Office.

Sa kanyang pagbisita, ipinasyal ang mga panauhin sa mga makasaysayang palatandaan at pangunahing lugar sa loob ng kampo. Isa ring Audio-Visual Presentation ang ipinakita, na nagbigay-diin sa mayamang kasaysayan ng Camp Major Bado Dangwa, na dating kilala bilang Camp Holmes noong panahon ng Ikalawang Digmaang Pandaigdig.

Sinundan ito ng isang maikling briefing na tumalakay sa makasaysayang kahalagahan ng kampo, partikular na ang monumento sa Mai-Mai Park. Ang monumentong ito ay nagsisilbing paalala ng katatagan at pagkakaisa ng mga nakapiit noong digmaan, lalo na ang mga Amerikanang at Pilipinang nars. Ang monumento, na itinayo noong 1992 sa pangunguna ni U.S. Ambassador Frank G. Wisner, ay alay sa humigit-kumulang 500 Amerikanong at Briton na misyonaryo, inhinyero, at sibilyan na ikinulong ng Hukbong Hapon sa Camp Holmes mula Abril 1942 hanggang Disyembre 1944.

Ang kanilang kabayanihan ay bahagi ng mas malawak na kwento ng mga tinaguriang “Angels of Bataan and Corregidor” — ang mga Amerikanang at Pilipinang nars ng militar na nagpakita ng pambihirang tapang sa panahon ng digmaan, marami sa kanila ay nakaranas ng pagkakapiit sa mga kampong tulad ng Santo Tomas, Los Baños, at Camp Holmes.

Ang pagbisitang ito ay nagbigay-diin sa matibay na ugnayang historikal at kultural sa pagitan ng mga Pilipino at Amerikano — bilang pagpupugay sa tapang at malasakit ng mga nakaranas ng hirap sa panahon ng digmaan, at pagpapakita ng pagpupunyagi ng PRO-CAR sa pagpapanatili ng alaala at pamana ng Camp Major Bado Dangwa bilang isang mahalagang bahagi ng kasaysayan — lokal man o pandaigdigan. # Mario D. Oclaman // FNS