“𝗣𝗮𝗻𝗮𝗻𝗮𝗴𝘂𝘁𝗮𝗻 𝗽𝗮 𝗿𝗶𝗻 𝗮𝗻𝗴 𝗸𝗼𝗻𝘁𝗿𝗮𝘁𝗶𝘀𝘁𝗮”- 𝗦𝗲𝗻. 𝗜𝗺𝗲𝗲 𝗠𝗮𝗿𝗰𝗼𝘀 𝘂𝗸𝗼𝗹 𝘀𝗮 𝗴𝘂𝗺𝘂𝗵𝗼𝗻𝗴 𝗦𝘁𝗮. 𝗠𝗮𝗿𝗶𝗮-𝗖𝗮𝗯𝗮𝗴𝗮𝗻 𝗕𝗿𝗶𝗱𝗴𝗲 𝘀𝗮 𝗜𝘀𝗮𝗯𝗲𝗹𝗮

Mga larawang kuha sa FB page ni Sen. Marcos.

𝗦𝗔𝗡 𝗠𝗔𝗧𝗘𝗢, 𝗜𝘀𝗮𝗯𝗲𝗹𝗮 (𝗔𝗴𝗼𝘀𝘁𝗼 𝟳, 𝟮𝟬𝟮𝟱) – “𝗣𝗮𝗻𝗮𝗻𝗮𝗴𝘂𝘁𝗮𝗻 𝗽𝗮 𝗿𝗶𝗻 𝗻𝗴 𝗸𝗼𝗻𝘁𝗿𝗮𝘁𝗶𝘀𝘁𝗮 ‘𝘆𝗼𝗻 𝗸𝗮𝘀𝗶 𝗵𝗶𝗻𝗱𝗶 𝗽𝗮 𝘁𝗮𝗽𝗼𝘀. 𝗞𝘂𝗺𝗯𝗮𝗴𝗮 𝗺𝗮𝗿𝗮𝗺𝗶𝗻𝗴 𝗶𝗻𝗰𝗼𝗺𝗽𝗹𝗲𝘁𝗲 𝗻𝗮 𝗯𝗮𝗴𝗮𝘆-𝗯𝗮𝗴𝗮𝘆”, 𝗶𝘁𝗼 𝗮𝗻𝗴 𝗻𝗮𝗴𝗶𝗻𝗴 𝗽𝗮𝗵𝗮𝘆𝗮𝗴 𝗻𝗶 𝗦𝗲𝗻𝗮𝘁𝗼𝗿 𝗜𝗺𝗲𝗲 𝗠𝗮𝗿𝗰𝗼𝘀 𝘂𝗸𝗼𝗹 𝘀𝗮 𝗶𝗺𝗽𝗼𝗿𝗺𝗮𝘀𝘆𝗼𝗻 𝗻𝗮 𝗽𝗼𝘀𝗶𝗯𝗹𝗲𝗻𝗴 𝗺𝗮𝗵𝗮𝗵𝗮𝗿𝗮𝗽 𝘀𝗮 𝗸𝗮𝘀𝗼𝗻𝗴 𝘀𝗶𝗯𝗶𝗹 𝗮𝘁 𝗸𝗿𝗶𝗺𝗶𝗻𝗮𝗹 𝗮𝗻𝗴 𝗱𝘂𝗺𝗽 𝘁𝗿𝘂𝗰𝗸 𝗱𝗿𝗶𝘃𝗲𝗿 𝗺𝘂𝗹𝗮 𝘀𝗮 𝗧𝗮𝗯𝘂𝗸 𝗖𝗶𝘁𝘆, 𝗞𝗮𝗹𝗶𝗻𝗴𝗮 𝗻𝗮 𝗶𝘁𝗶𝗻𝘂𝘁𝘂𝗿𝗼𝗻𝗴 𝗱𝗮𝗵𝗶𝗹𝗮𝗻 𝗻𝗴 𝗽𝗮𝗴𝗯𝗮𝗴𝘀𝗮𝗸 𝗻𝗴 𝟭.𝟮 𝗯𝗶𝗹𝘆𝗼𝗻𝗴 𝗦𝘁𝗮. 𝗠𝗮𝗿𝗶𝗮-𝗖𝗮𝗯𝗮𝗴𝗮𝗻 𝗕𝗿𝗶𝗱𝗴𝗲 𝗻𝗼𝗼𝗻𝗴 𝗣𝗲𝗯𝗿𝗲𝗿𝗼 𝟮𝟳.

Ang pahayag ay isinagawa ng Senadora sa “Kapihan sa Senado” na dinaluhan ng mga mamamahayag ngayong araw, Agosto 7.

“Malapit sa puso namin ‘yang Cabagan Bridge na ‘yan kasi hindi pangkaraniwang tulay… ito talaga ang nagdudugtong ng Region 2, No. 2 Rice Producer and No. 1 Corn Producer. Sa Cordillera, No.1 Vegetable Producer. Lahat ng pagkain ng Maynila, nangagaling diyan. Kapag hindi nabuo iyong Cabagan, talagang hirap lahat”, ani Sen. Imee.

Kanya ring sinabi na noong taong 2013 pa sinimulan ang konstruksyon ng tulay. ” Biglang ang tanging may kasalanan iyong truck driver, hindi naman siguro nagyari iyon, hindi naman totoo siguro”, diin ni Sen. Imee.

Maraming bagay umano ang nakita na naging dahilan ng pagguho nito tulad na lamang ng faulty design, working drawing, madayang implementasyon dahil sa maninipis na bakal na ginamit sa istraktura, hindi sapat na steel straps, at kulang-kulang na bolt at turnilyo.

“Maraming problema. Kung bakit ito naa-approve at taon-taon, nabibigyan ng dagdag na pondo?”, ani Sen. Imee.

Dagdag pa niya, hindi pa ito idineklarang kumpleto at hindi pa pormal na nai-turn-over sa Department of Public Works and Hi-ways kaya’t pananagutan pa rin ito ng contractor. # 𝗠𝗮𝗲 𝗕𝗮𝗿𝗮𝗻𝗴𝗮𝗻